微軟官網都賣千幾蚊「山寨」Windows 8.1 平板,高登黃金仲使玩?

2015-03-11 19:58
向來版主們同大家分享平價又抵玩的平版多數都會去深水埗搵料,但如果大家想買平價 Windows 平板的話可能以後唔需要再周圍格價咁辛苦啦!最近 Microsoft 就開通左 Microsoft Store 平板購物服務,究竟價錢同場外比有無更平,而幫襯 Microsoft Store 又是否更划算呢?今次版主就同大家分享下,想入手平價 Windows 平板的朋友就要留意啦!icon

微軟官網都賣千幾蚊「山寨」Windows 8.1 平板,高登黃金仲使玩?-1
 

微軟官方 Microsoft Store 賣國牌平板,7 日包換加免費送貨

首先簡介一下今次的主角 Microsoft Store ,其實 Microsoft 一直都有係 Microsoft Store 展示部份 Windows 平板,但係直接係網上售賣就係近期先有的事,所以大家可以見到目前係 Microsoft Store 上出售的平板只係得五款,而且所有平板都係大陸品牌,比較知名的有 PiPO 同埋 馳為 (CHUWI)。反而大家熟悉的牌子好似 Acer 、 Lenovo 、 Asus 係 Microsoft Store 上都係見不到的。既然只係得啲大陸二線牌子平板,咁究竟吸引力又係邊呢?除左係 Microsoft Store 上購買大家會較安心之外, Microsoft 亦都會提供免費送貨同埋 7 日包換再加埋送一張 32GB SD Card 以及 $30  Click Play 電影點播優惠券。(多謝晒icon)不過,大家最關注的賣價,究竟 Microsoft Store 上的平板價錢同目前深水埗賣價相差得遠唔遠呢?版主就同大家格下價!


 微軟官網都賣千幾蚊「山寨」Windows 8.1 平板,高登黃金仲使玩?-3
▲ Microsoft Store 目前所賣的平板多以大陸「山寨」牌子為主。


Microsoft 官方價 VS 深水埗場價,邊個更加抵?

目前係 Microsoft Store 上有售的平板來講,版主今日落場行過,基本上 LiveFan (樂凡)的 FF8C 64G 同埋 WMP BTF101 而家係場內真係好難搵到,大家去 Microsoft Store 買比落深水埗買會更方便(版主今日已經搵唔到,亦都比較唔到價錢)。而 PiPO 的 W4 同 W6 以及馳為的 Vi8 呢,大家要留意了。
 

PiPO W4 、 W6 場內價更平兼送 Keyboard

首先係 PiPO 的 W4 ,呢部平板有 8 吋 1280 x 800 IPS 屏幕, INTEL ATOM Z3735G 1.83GHz 四核心處理配上 1GB RAM 同埋 16GB 內置容量,前鏡頭有 30 萬像素同埋 200 萬像素主鏡頭。係  Microsoft Store 上定價係 $799 。而呢部平板係場內大約價位要 7 字頭,而最平的就只需 $699 再送多個 Keyboard 套。另一部 PiPO W6 (Wifi 版) 規格比較強,除左有 8.9 吋 1920 x 1200 IPS 屏幕之外,亦有 Intel ATOM 四核 Z3735F 處理器配 2GB RAM 同埋 32GB 內置容量,前鏡頭都有 200 萬像素而主鏡頭有 500 像素。係  Microsoft Store 上 PiPO W6 定價 $1499 。係場內,有一間做緊 $1299 兼送多個原裝藍牙 Keyboard ,咁真係比 Microsoft Store 抵唔少啊。


馳為 Vi8 場內價同 Microsoft Store 相近,但另有雙系統版本一千蚊有找!

最後就係馳為的 Vi8 啦!呢部平板版主之前都介紹過,規格上有 8 吋 1280 x 800 IPS 屏幕, Intel ATOM Z3735G 1.83GHz 四核心處理配上 2GB RAM 同埋 32GB 內置容量, 200 萬像素前鏡頭同埋 500 萬像素主鏡頭。係網上買馳為 Vi8 定價 $899 ,呢部機場價比 Microsoft Store 唔平得幾多,版主見過最平都要 $830 。但有樣野值得大家留意,馳為 Vi8 係場內係有雙系統版本的,賣價 $999 ,而雙系統版本的 Vi8 Microsoft Store 當然係唔會賣啦!下面有個簡表,方便大家睇。
 
Windows 平板型號 Microsoft Store 深水埗
PiPO W4 $799 $699
PiPO W6 $1499 $1299
馳為Vi8 $899 $830
 
微軟官網都賣千幾蚊「山寨」Windows 8.1 平板,高登黃金仲使玩?-4
▲ PiPO W6 場內最平 $1299 同 Microsoft 的 $1499 差距算係大,場內入手仲要送藍牙 Keyboard ,比著我就揀係場內買啦。
 

比拼: Microsoft Store 夠方便,深水埗價更平!

睇到呢度,網友都可能問:究竟上 Microsoft Store 買國牌既平板好唔好呢?其實「山寨平板」大家好難係大鋪買到,要買唯有落深水埗,一來一回都可能要幾十蚊啦,大家係 Microsoft Store 買呢類平板其實都係一個選擇,加上官方買保養方面無疑係比較安心嘅。但若果你目光放係價錢上,深水埗又平又有 Keyboard 套等贈品送,當然就係抵啦!就好似版主所講, PiPO W6 差價有 $200+ Keyboard ,但就唔係間間做到呢個價,要花少少時間去搵啊。最後想問下,當入手 Windows 平板時,唔知大家又會揀比較安心方便又輕鬆的 Microsoft Store 定還是價錢更有優勢的深水埗呢?不妨留言分享下啦!icon

來源: Microsoft Store
您可能也喜歡▼