Samsung View 少量規格曝光! 資料已登錄 GFXBench!

2015-10-02 17:22
九月頭嘅時候,版主 Lawrence 曾經為大家介紹過一部比 MacBook Pro 更大芒嘅平板電腦,佢個名叫做 Samsung Galaxy View,唔知大家有無印象呢? 最近有部代號為 Samsung SM-T670 嘅平板電腦登錄左 GFXBench 嘅資料庫,估計就係呢部 Samsung Galaxy View。事不宜遲,我地即刻睇下更多有關呢部 Galaxy View 嘅資料啦! 

Samsung View 少量規格曝光! 資料已登錄 GFXBench!

比 MacBook Pro 更大,採用 18.5 吋大屏幕
版主 Lawrence 之前提過,Samsung 以 「Think big, then think bigger」為口號,宣傳呢部 Galaxy View 嘅屏幕將會比 Samsung 現行的平板電腦更大。之前呢部 Galaxy View 傳擁有 18.4 吋大屏幕,但根據 GFXBench 最新嘅資訊顯示,呢部 Galaxy View 實質有 18.5 吋 1080p 高清大屏幕,同 MacBook Pro 相比,呢部 Galaxy View 嘅屏幕比 MacBook Pro 大左成 1.5 吋咁多。但實質屏幕大小係幾多呢? 一日未公佈,一日都無確實答案,只能預計 18.4-18.5 吋左右吧!

Exynos 7580 八核心處理器,支援 FHD 錄影
在規格方面,根據 GFXBench 嘅資料顯示,Samsung Galaxy View 配備了自家的 Exynos 7580 1.6 GHz 八核心處理器及 ARM Mali T-720 圖像處理器,並配備 2 GB RAM 以及 32 GB ROM。至於相機方面,呢部 Samsung Galaxy View 並沒有支持主鏡頭,但採用了 200 萬像素嘅前置鏡頭,並支援 1080p 全高清錄影。除此之外,呢部 Galaxy View 並沒有 Sim 卡槽,意味着只支持 Wi-Fi 上網。

Samsung View 少量規格曝光! 資料已登錄 GFXBench!
▲ GFXBench 資料庫上有關 Samsung Galaxy View 的規格資訊。

如果 Galaxy View 嘅配置真的如 GFXBench 嘅資料一樣嘅話,咁呢部 Galaxy View 除左大芒之外,其實並沒有甚麼特別之處。而家版主我最想知道嘅係佢嘅價錢,如果價錢唔係太貴嘅話,都值得買黎做下文書工作嘅! 如果呢部 Galaxy View 都賣成五六千的話,咁我會寧願買 Microsoft Surface Pro 或者 iPad Pro 好過! 唔知你哋又點睇呢? 你覺得咁嘅規格應該值咩嘢價錢呢?