華為 MediaPad X2 大鋪終於減! P8 讓路 Mate S 減五百抵唔抵?

2015-10-02 21:24
之前有同大家提到華為有部以 Force Touch 為賣點的新機 Mate S 好快會在港登場,呢部機同之前大受歡迎的 Mate 7 金色加強版一樣用上金屬機身同埋有 P8 同級的 1300 萬像素鏡頭,可以話係華為下半年度的重點機種。近排呢部機就係大鋪「偷步開賣」,連帶其他機款包括係平板市場大熱的 MediaPad X2 都一齊減價!當中有部份機款更加減左唔少,一齊睇睇邊部抵玩啦!

華為 MediaPad X2 大鋪終於減! P8 讓路 Mate S 減五百抵唔抵?


MediaPad X2 大鋪減價!細鋪行貨未有大變動

提起華為,相信而家口碑最好同時最多朋友入手左的都係在暑假期間先正式在港推出的 MediaPad X2 ,呢部外型似平板但同時能打出打入的「手機」在港行要價 $3280 後不少網友都大表失望。近排有賣 MediaPad X2 的大鋪就將 MediaPad X2 減至 $3080 ,即係平左兩舊水咁多。另外,之前版主提過,在深水埗細鋪入手 MediaPad X2 行貨會較為著數,目前為止都仍然係賣緊 $2680 沒有甚麼大變動。

華為 MediaPad X2 大鋪終於減! P8 讓路 Mate S 減五百抵唔抵?
▲大鋪入手 MediaPad X2 的話仲會送多個原裝皮套。
 

Mate S 「偷步」開賣, P8 / P8 金色加強版即時減!

除左 MediaPad X2 之外, P8 同係稍後時間推出的 P8 金色加強版都要讓路 Mate S 而減價。講返 Mate S ,原定在香港舉行發佈會的時間係 10 月 5 日,但係而家在大鋪都已經買得到。要留意係本身 Mate S 以支援 Force Touch 作為賣點,但而家賣緊街的版本雖然有 3GB RAM 以及 64GB 內置容量,但卻沒有 Force Touch ,要用到 Force Touch 的話可能要等到 12 月出新版本先有。

講完 Mate S 之後再提下另一部華為旗艦 P8 ,其實從規格上來講, P8 跟 Mate S 的差別唔係好大,同樣係 FHD 解像度(但 Mate S 有 5.5 吋芒比起 P8 大),處理器方面 P8 就係 Kirin 930 八核配 3GB RAM 同埋 16GB 內置容量。相機兩部都係 1300 萬像素主鏡頭,最有趣係連電池容量都差不多, 5.2 吋芒的 P8 電池容量係 2600mAh ,而 Mate S 有 5.5 吋芒但都係 2700mAh 。係價錢方面,而家 P8 賣價為 $3280 而 P8 加強版就係 $4180 ,而 Mate S 就要 $4888 ,大家又覺得 Mate S 同 P8 相比,邊個性價比更高呢?

華為 MediaPad X2 大鋪終於減! P8 讓路 Mate S 減五百抵唔抵?
▲ Mate S 而家係大鋪已經有實機放左出來,價錢就係 $4888 ,大家又覺得抵唔抵呢?

在文章發佈時,華為 MediaPad X2 最平賣價為 $2680,按此看詳細規格及最新賣價。
在文章發佈時,華為 P8 最新賣價為 $3280,按此看詳細規格及最新賣價。
在文章發佈時,華為 P8 加強版最新賣價為 $4180,按此看詳細規格及最新賣價。