有無咁荀? Google Nexus 7 四百蚊有找,呢個價買唔買?

2015-06-25 21:05
剛剛就分享左 Nexus 6 係大鋪做緊清貨減價,可能大家都覺得仲要成四千仍然未夠吸引,不過唔緊要!因為版主搵到同樣係「親生仔」的 Google Nexus 系產品,今次的主角就係 Nexus 7 平板,價錢方面更加係平到 $360 蚊就有交易!點解可以做到咁平呢?咁就要睇下文先知啦。

(更新:實在完全出乎左意料之外, 8GB 版本同 32GB 版本的 Nexus 7 2012 已經被抽起了,但仍有 16GB 版本可以選擇,價錢比起完本 8GB 版本貴一百,盛惠 $490 ,再附上 expansys hk 傳送門。)

有無咁荀? Google Nexus 7 四百蚊有找,呢個價買唔買?
 

Google 官方翻新版 Nexus 2012 版本賣價唔過 $400 !

點解四百蚊唔使可以買到 Nexus 平板呢?正常來講咁平當然無可能啦,其實今次呢個價錢買到嘅係 Google 官方翻新,而且係 2012 年版本的 Nexus 7 ,內置容量方面都只有 8GB 同埋係 Wifi 版本。有關 Nexus 7 2012 年版本的規格大家可能都已經唔記得左,所以而家都再提一次先。

係屏幕上 Nexus 7 2012 8GB 版有 7 吋 1280x800 屏幕, NVIDIA Tegra 3 四核處理器配 1GB RAM 以及 8GB 內置容量。係鏡頭方面 Nexus 7 只係有 120 萬像素前置鏡頭而沒有前主鏡頭的。電量方面就係 4325mAh 。雖然本身只係有 Android 4.1 ,不過作為親生仔, Nexis 7 2012 年版都已經可以升到上 Android 5.1 啦!(但係得 8GB 容量真係唔知會唔會唔夠用)

對於心郁郁想入手的朋友來講,相信最大的顧慮會係保養方面的問題。而今次出售翻新 Nexus 7 的 Expansys HK 就提到除左會有新的包裝盒之外,亦都會有 3 個月的保養。而係品質方面,佢哋更強調今次推出的翻新版本係經過品質保證。除左 $360 的 8GB 版本 Nexus 2012 之外,亦都有 32GB 版本的 Nexus 7 ,不過價錢上就未必咁吸引,都要成 $759 。 唔知大家又覺得四百有找的 Nexus 7 又算唔算抵玩呢?一齊講講啦。

有無咁荀? Google Nexus 7 四百蚊有找,呢個價買唔買?
▲ 雖然 2012 年版本 Nexus 7 已經推出左好一段時間,不過如果價錢夠平,吸引力都仍然係好唔錯啊!

更新 8GB 版本同 32GB 版本已被下架,更新前一刻仲有 16GB 版本。

有無咁荀? Google Nexus 7 四百蚊有找,呢個價買唔買?